BOIRO> A Asociación Peñas Boiro conseguiu recadar preto duns dous mil quilos de alimentos non perecedeiros na campaña desenvolvida en varios supermercados da localidade durante as últimas semanas. Todo o recadado xa lle foi entregado a Cáritas para a súa distribución entre as familias máis necesitadas do municipio.
Ao final conseguíronse recadar preto dos dous mil quilos de alimentos. A campaña, desenvolvida do 8 ó 21 deste mes de abril en varios supermercados da localidade, ía en beneficio de Cáritas para ser distribuídos entre aquelas familias máis afectadas pola pandemia do coronavirus.
A Asociación de Peñas de Boiro conseguiu tamén xestionar unha partida de cinco toneladas de patacas procedentes da Limia.
Dende a entidade quixeron destacar o traballo que realizan entidades coma Cáritas, máis agora, nunha época complicada, na que existen moitas familias que están a pasar por unha situación delicada.