SALNÉS/BARBANZA> Xa coñecemos os datos do paro de abril. Unhas cifras agardadas pero non por iso menos duras. En Galicia o desemprego disparouse en máis de 17.000 persoas nun mercado laboral fortemente golpeado pola crise sanitaria do coronavirus. O impacto tamén se notou en Arousa. No Salnés, máis de 600 persoas perderon o seu posto de traballo; no Barbanza, foron máis de 400. O sector máis castigado, o servizos.
Abril segue a tendencia do mes de marzo no mercado laboral. O COVID-19 golpea con forza o tecido económico e deixa tras de si un importante incremento de parados. O Salnés acada xa os 9.528 desempregados, con 643 máis que en marzo. O concello máis prexudicado é o de Vilagarcía, seguido do de Sanxenxo. Na comarca nótase con especial forza o peso do sector servizos na economía; o máis castigado pola crise do coronavirus: máis de 6.600 desempregados proceden deste sector.
Na comarca de Caldas súmanse xa 2.809 parados, 349 máis que en marzo. Aquí o concello caldense é o máis prexudicado, seguido de Valga. Xa no Barbanza, pasaron ao paro 432 veciños máis, acadando os 4.062. Ribeira encabeza este ranking, seguido de Boiro. Unha vez máis, o sector servizos é o máis golpeado, sumando 2800 parados.
O peche de negocios e a paralización das empresas e da actividade económica pola crise do coronavirus tamén impactou con forza nos autónomos. En Galicia, 1.629 pecharon os seus negocios, uns 150 deles en Arousa.
