RIBEIRA> A mellor maneira de saír adiante nestes tempos de crise é reinventarse. Así o fixo a tenda de decoración Laguerzza de Ribeira. Ós seus traballos habituais sumaron a confección de máscaras homologadas que se están a comercializar en farmacias e empresas.
A crise provocada polo coronavirus obrigou a Pura e Olga, propietarias de Laguerzza, a botar o peche da súa tenda de decoración en Ribeira. Sen embargo, dado que dispoñen de taller propio, viron a oportunidade de aportar o seu gran de area confeccionando máscaras que doaron ó concello de Ribeira. A acollida foi tan boa que estas dúas emprendedoras aventuráronse a comercializar as máscaras con material sanitario homologado que xa se distribuíron en empresas e farmacias da zona.
Dispoñen de varios modelos, todos reutilizables xa que se poden lavar e con características específicas segundo os usos ós que están destinadas.
Mentres tanto, afanadas aínda na elaboración de material de protección, continúan traballando nas encargas que tiñan pendentes e xa atenden no local con cita previa.
Polo momento, as vendas son aínda moi tímidas pero dende Laguerzza agardan que pouco a pouco se vaian estabilizando. Non estaría nada mal redecorar os nosos fogares, nos que tanto tempo estamos pasando, cando logremos superar esta pandemia.
