O GROVE> Gran susto o que se levaron esta mañá os veciños de San Vicente do Grove. A rotura dun dos muros dun depósito de auga provocou que a parede saíse despedida esnaquizando parte da planta baixa dun dos edificios próximos. A auga baixou en tromba cara a praia de pedras negras arrastrando coches ao seu paso. Os danos materiais son importantes pero por sorte non hai ningunha persoa ferida.
Cara as 11 e media da mañá, a tranquilidade dos veciños de San Vicente do Grove viuse sorprendida por un forte ruído. O estrondo veu acompañado por unha gran riada que levaba ao seu paso vehículos e electrodomésticos. O medo apoderouse da veciñanza desta zona.
A riada levou consigo varios coches, un deles, pasou por riba dun dos muros das casas veciñas caendo no seu patio.
O suceso tivo a súa orixe na rotura dun dos muros do depósito de auga de San Vicente. A presión da auga provocou que a parede saíse despedida golpeando con forza a planta baixa dun dos edificios próximos. Ao producirse a rotura, os 800 metros cúbicos de auga que almacenaba o depósito baixaron polas rúas en forma de riada cara a praia de Pedras Negras.
A rotura provocou importantes danos materiais pero por sorte ningunha persoa resultou ferida.
Ata o lugar desprazáronse efectivos da Garda civil, de bombeiros do Salnés, de emerxencias do Grove e da policía local. Os servizos de seguridade e emerxencias acordoaron a zona e procederon á retirada dos escombros e á recuperación do subministro de auga e electricidade para os veciños da zona. Dada a importancia dos danos materiais, as tarefas de recuperación estendéronse durante horas deixando sen subministro a preto de 200 vivendas.
Segundo indica o alcalde o tanque atopábase cheo debido á falta de consumo dos últimos días. Os informes dos equipos de emerxencias indican que non hai risco de derrube nin no depósito nin nos edificios próximos.