O Salnés concentra os seus encantos en 40 segundos para atraer o turismo de proximidade

O SALNÉS> O turista de proximidade é o novo obxectivo da Mancomunidade do Salnés para esta tempada. O ente comarcal tivo que reorientar a súa estratexia promocional pola COVID-19, que inicialmente estaba dirixida ao visitante estranxeiro. A través dun spot publicitario presumen dos encantos da comarca.

Este é o spot co que a Mancomunidade do Salnés quere atrapar ao turista de proximidade. A COVID-19 mudou aquí tamén as regras do xogo, facendo ao ente cambiar o seu obxectivo.

Trátase dun vídeo curto, duns 40 segundos, ao que pronto se sumarán outros catro. Cinco pezas en total que resumen os encantos do Salnés.

Polo de momento, a Mancomunidade non ten previsións das visitas que poderán recibir ao longo do verán. Con este material buscan atraelas, e axudar aos sectores máis afectados pola crise do coronavirus.

Dende a Mancomunidade confesan que a crise sanitaria obrigou a mudar os seus plans, que incluían varias accións promocionais no estranxeiro, incluído China.

Polémica

Segundo explican dende a Mancomunidade o obxectivo do vídeo é captar os principais atractivos da comarca do Salnés. Pero o spot foi criticado estes días pola asociación Presume de Vilanova. Segundo o colectivo, a peza exclúe o seu concello das imaxes. A presidenta comarcal xa anunciou que nos vindeiros días manterá un encontro con eles para explicarlles os criterios seguidos na elaboración do vídeo.