PORTO DO SON> Transcorridos xa once días dende a súa desaparición ninguén en Porto do Son deixa de buscar a Javier e a Miguel. Durante toda a mañá, Salvamento Marítimo e o servizo de Gardacostas despregaron numerosos medios entre A Filgueira e a illa da Creba. Pola tarde, varias embarcacións da confraría de Porto do Son sumáronse ó operativo de busca.
Por mar e por terra son numerosos os medios que seguen na procura de Xabier Hurtado e Miguel Quan desaparecidos xa hai once días mentres navegaban pola ría a bordo dun kaiak. Onte intensificábase o operativo ó cumprirse o prazo de tempo no que hai maiores posibilidades de que os corpos emerxan. E ó longo desta xornada numerosas embarcacións volveron saír ó mar en busca dos mozos.
Tamén por terra, son moitísimos os voluntarios que buscan incansablemente calquera indicio que lles permita devolver os corpos ás familias. Mañá volverán sumarse ó operativo barcos de Noia como xa fixeron o mércores. Dende a confraría de Porto do Son teñen todas as esperanzas en que aparezan polo que non deixarán de buscar ata que consigan dar descanso ás familias.
