NOIA> A Garda Civil detivo a un veciño da localidade como presunto autor de varios roubos cometidos en coches estacionados nas praias da comarca. Os axentes lograron recuperar parte dos obxectos subtraídos e uns 1.500 euros en metálico.
En total está acusado de cometer máis dunha ducia de roubos en coches estacionados en varias praias da comarca. A colaboración cidadá foi tamén fundamental para a súa detención, xa que unha descrición facilitada por uns testemuños, puxo á Garda Civil sobre a pista.
Presuntamente foi o autor de roubos en vehículos estacionados nos areais sonenses de Baroña, A Aguieira, As Gaviotas e Os Castros e tamén noutros cometidos na praia de Broña en Outes.
Ó parecer sempre empregaba o mesmo ‘modus operandi’. Buscaba estacionamentos masificados e sen vixilancia. Coa axuda dunha pedra rompía un dos cristais do vehículo para levarse todo o de valor que houbera.
A Garda Civil puido recuperar boa parte dos obxectos subtraídos, que xa foron devoltos ós seus propietarios, así como uns 1.500 euros en metálico.