BOIRO> A Garda Civil de Boiro detivo novamente a un dos veciños da localidade acusados de elaborar xel hidroalcólico con augardente. Segundo informaron fontes do Instituto Armado, o individuo rompeu o precinto policial que existía na nave onde elaboraban o produto ilegal para continuar coa súa distribución.
O prendido, duns 42 anos de idade, xa pasou durante a fin de semana a disposición do Xulgado de Primeira Instancia e Instrución Número 2 de Ribeira, en funcións de garda, que xa instrúe a causa principal.
A xuíza decretou a súa liberdade con cargos, obrigándoo, coma medida cautelar, a presentarse no xulgado cada quince días. Está sendo investigado por varios delitos, entre eles estafa e falsidade documental.
