SANXENXO> O club de Piragüismo de Portonovo xa dispón dunhas novas instalacións para os seus deportistas. A nova sede ten unha superficie de 300 metros cadrados e está situada na praia de Baltar. O traslado permitirá ao club mellorar a comodidade e a seguridade dos seus piragüistas.
Con esta simbólica entrega de chaves, inaugurábanse en Sanxenxo a nova sede do real club náutico de Portonovo. Unhas instalacións que xa son unha realidade despois de máis de 10 anos agardando por elas. A nova nave ten unha superficie de 300 metros cadrados e contou cun investimento de preto de 200 mil euros.
As novas instalación están situadas na praia de Baltar. Unha localización que evitará, aos preto de 120 piragüistas do club, atravesar a estrada para poder chegar ao mar.
A instalación conta con tres baños, un deles adaptado, unha oficina, ximnasio e un almacén que pode dar cabida a máis de 80 piraguas. Unha nova sede que permitirá ao club seguir mellorando.
Concello e club xa traballan para equipar por completo a instalación. No caso do ximnasio, estará dotado con máquinas procedentes da piscina municipal. Dende o concello matizan que esta xa é a sede definitiva do club. No futuro se é necesario faranse as reformas oportunas para adaptarse tanto ao crecemento do club como ao novo proxecto de remodelación do porto de Portonovo.
