Sanidade pecha o Colexio Calasancio de Pontevedra por un brote de coronavirus

PONTEVEDRA> Sanidade pecha o Colexio Calasancio de Pontevedra por un gromo de coronavirus. O brote rexistrouse entre os profesores e persoal non docente e as clases foron suspendidas ata novo aviso. Este é o primeiro centro en toda Galicia que rexistra un brote de Covid.

A estas horas, este colexio de Pontevedra debería estar cheo de rapaces e rapazas. Así e todo, a imaxe hoxe é moi distinta. A Consellería de Sanidade ordenou pechar este colexio tras detectarse un brote de Covid entre o persoal do centro.

Todo comezou o pasado xoves, coincidindo coa volta ao cole. Un dos membros do equipo directivo deu positivo en coronavirus e, a continuación procedeuse a confinar a outras 5 persoas de dirección.

Un día máis tarde, outra profesora que non formaba parte deste equipo, presentou síntomas compatibles co coronavirus. A docente foi sometida a unha proba PCR e resultou dar positivo.

Como medida de seguridade, ao longo de toda a fin de semana, realizáronse PCRs a todo o persoal do centro. Unhas probas nas que 8 persoas máis deron tamén positivo.

Tras o peche deste colexio, dende o Concello de Pontevedra quixeron enviar unha mensaxe de apoio e ánimo a toda a comunidade educativa. Así e todo, tanto o alcalde da cidade como o concelleiro de Educación aseguraron que esta situación era esperada.

Durante os vindeiros días procederase á desinfección de todas as instalacións do centro educativo. Ademais, tampouco se descarta realizar probas PCR a todos os estudantes que estiveran en contacto co persoal infectado. Por último, dende o colexio estudarán a posibilidade de contratar a novos profesores ou impulsar a teledocencia.