A USC ratifica a continuidade da Estación Hidrobiolóxica do Con

VILAGARCÍA> A continuidade da estación hidrobiolóxica do Con está garantida. O reitor da Universidade de Santiago mantivo un encontro cos alcaldes de Vilagarcía e Caldas para ratificar este compromiso. Asegura que os cambios na dirección do centro débense a unha reestruturación das tres estacións que a USC ten en Galicia.

Trátase dun proceso organizativo no que, en ningún momento se puxo en cuestión o seu futuro.  Así despexa as dúbidas sobre o futuro da estación hidrobiolóxica do Con o reitor da Universidade de Santiago.

O reitor reuniuse cos alcaldes de Vilagarcía e Caldas para trasladar esta mensaxe. Di que o futuro das tres estacións, entre elas a do Con, está garantido, buscando incrementa-la implicación do estudantado.

O reitor insiste en que a continuidade do persoal está garantida e que a destitución de Fernando Cobo como director débese a que, dende agora, só haberá  un único coordinador para O Con, Ferrol e O Courel.  O alcalde vilagarcián, pola súa banda, amosou a súa satisfacción pola continuidade do centro.

O reitor amosouse disposto a mellora-la colaboración cos concellos, na procura de novas vías de traballo para estes centros. Polo de pronto, acordaron celebrar unha nova xuntanza nas vindeiras semanas.

DEIXAR UNHA RESPOSTA

Por favor, engade un comentario!
Por favor, engade o teu nome aquí