O SALNES> A Mancomunidade do Salnés lanza un novo obradoiro de emprego centrado na promoción turística da comarca. Está dividido en dous módulos, marketing turístico e guía turístico. Vaise celebrar en Ribadumia e, en total, 16 mozos recibirán formación ao longo dos vindeiros 12 meses.
O Salnés é a comarca máis turística de Galicia. Nos seus nove concellos hai tantos hoteis como nas provincias de Ourense e Lugo. Coñecedores da importancia deste sector para a economía da zona, a Mancomunidade do Salnés impulsa un novo obradoiro formativo para o fomento da promoción turística. Trátase dun proxecto pioneiro, dividido en dous módulos: marketing turístico e guía turístico especializado na comarca.
O obradoiro marca como reto saber determinar cales son os obxectivos da estratexia turística da zona e ensinar ós futuros profesionais do sector a traballar en equipo, unidos baixo un obxectivo común.
O obradoiro vaise celebrar na casa da cultura de Ribadumia. O alcalde da localidade salienta a súa utilidade para o conxunto da comarca.
En total, nesta acción formativa participarán estes 16 alumnos, que recibirán formación durante o vindeiro ano.
