NOIA> Máis de trinta establecementos comerciais participarán a partir deste venres, e durante toda a fin de semana, nunha nova edición do ‘Sábado Negro’, organizada por Noia Histórica. As tendas abrirán as súas portas ata as dez da noite e ofrecerán descontos do vinte por cento en tódolos seus artigos.
Lonxe de suspender a súa programación debido á crise sanitaria provocada pola covid, Noia Histórica decide apostar forte e volver a organizar unha nova edición do Sábado Negro. A campaña pretende contribuír a que os negocios poidan mellorar as súas vendas nun ano que non está a ser o agardado.
Dende Noia Histórica din que a campaña desenvolverase cumprindo as normas impostas polas autoridades sanitarias.
Para posibilitar un mellor desenvolvemento da campaña, a patronal noiesa decidiu ampliala a tres días. Dende mañá venres ata o domingo. Esta será unha das principais novidades xunto coa posibilidade de poder realizar tamén as compras online, a través da plataforma vadetiendas.
Dende o Concello fan un chamamento a participar nesta campaña e achegarse a Noia a facer as súas compras, aproveitando ademais a celebración da Mostra de Curtas.