SANXENXO> Avalancha de solidariedade a que recibiu a familia de Portonovo en risco de desafiuzamento. Co apoio recibido a familia poderá saldar a súa débeda, pagar o aluguer dunha nova casa durante os vindeiros meses e darlle un bo nadal ao seu fillo Adrián. As axudas chegaron de todas partes do mundo, entre elas, o pianista internacional James Rhodes.
Avalancha de solidariedade. Esa foi a resposta que a familia de Portonovo en risco de desafiuzamento recibiu de xente de todo o mundo. Numerosas persoas contactaron coa familia para colaborar con eles, a súa situación cambiou en tan só uns días.
A familia poderá pagar agora a súa débeda e mudarse á nova vivenda.
O principal apoio desta familia chegou da man da veciñanza de Portonovo. Grazas a unha nai dun compañeiro de colexio do seu fillo Adrián, a familia terá unha nova vivenda. Pero as axudas chegaron dende todos os puntos do mundo, asegurando os vindeiros meses de aluguer. A colaboración máis sorprendente chegou do pianista internacional James Rhodes, a familia non o cría cando o artista contactou con eles.
En conversa co canal rías baixas, o artista mostrouse sorprendido de que non sexan as administracións as que axuden as familias cunha situación tan delicada. As aportacións da xente desbordou á propia familia, que doará parte da comida e dos xoguetes recibidos a outras familias que tamén o necesitan.
A cadea de solidariedade xurdida con esta familia non se detén, segundo contan, moitas persoas puxéronse en contacto con eles para realizar campañas de recollida de alimentos e xoguetes para doar aos máis necesitados.
