A POBRA> Os hostaleiros do Barbanza saíron á rúa para denunciar a difícil situación que están a vivir tras meses encadeando perdas por mor das restricións sanitarias. Na Pobra fixérono con esta cacerolada á que ademais de representantes do sector sumáronse numerosos veciños e representantes da corporación, en apoio a un dos piares económicos do municipio.
Durante a protesta, deron lectura a un manifesto no que insisten no escrupuloso cumprimento das normas sanitarias por parte dun sector que está a ser culpabilizado inxustamente.
En Ribeira tamén os hostaleiros se manifestaron na praza do concello para demandar un plan de rescate que lles permita manter os seus negocios activos e non ter que recorrer ó peche ante a imposibilidade de traballar en condicións normais.
Tamén a corporación ribeirense apoia as reivindicacións dos hostaleiros así como o fondo de compensación que vén de ser aprobado pola Xunta para paliar as perdas do sector.
