Recollen sinaturas para que reabra a piscina de Vilagarcía para persoas que fan rehabilitación

VILAGARCIA> Un grupo de usuarios da Piscina Municipal de Vilagarcía con distintas patoloxías reclama a reapertura das instalacións para poder trata-las súas doenzas. Indican que precisan nadar a diario por recomendación médica. Acaban de iniciar unha recollida de sinaturas para que a Xunta e o Concello reabran o centro, pechado dende mediados de xaneiro polas restricións impostas polo avance da pandemia.

O peche de ximnasios e piscinas pode ser un incordio para aqueles que queren estar en forma pero un calvario para os que precisan do deporte para a rehabilitación de distintas enfermidades.

En Vilagarcía, un grupo de afectados reclama a inmediata reapertura das instalacións municipais. Explican que acoden a nadar a diario seguindo recomendacións médicas, para tratar doenzas como a esclerose, artrite, parkingson ou mesmo minusvalías.

A través dun comunicado, aseguran que precisan deste tipo de actividade física como ferramenta para a rehabilitación e mantemento da súa saúde física e mental porque, explican, agora máis que nunca, a natación sérvelles a regula-las emocións, en especial, a ansiedade e o estrés.

Indican tamén que a medicina sempre recomendou a natación como ferramenta para mellorar diversas patoloxías porque os exercicios dentro da auga permiten mellora-la capacidade motriz, a sensibilidade, a motivación e a actitude dos doentes ante a súa enfermidade.

Os usuarios aportan, ademais, informes de distintos expertos nos que se apunta a que a probabilidade de contaxio en augas de praias ou piscinas é moi escasa.  Un argumento que tamén coincidiría co exposto nun informe do Ministerio de Sanidade, de maio do ano pasado. Nel exponse que o correcto funcionamento e desinfección das instalacións deberían inactiva-la propagación do virus.

Os afectados acaban de iniciar unha recollida de sinaturas en papel e outra virtual, a través de Change.org esixindo á Xunta e ó Concello que garantan a reapertura das instalacións a partir do 17 deste mes. Din que non poden deixar pasar máis tempo sen facer exercicio polo ben da súa saúde.