NOIA> A actuación contará cun orzamento de máis de 700 mil euros.
O delegado da Xunta na Coruña, Gonzalo Trenor, acompañado dos alcaldes de Noia e Outes, Santiago Freire e Manuel González, respectivamente, realizaron este mediodía unha visita a Ponte Nafonso. A súa visita tiña coma principal finalidade anunciar a licitación das obras de reparación e posta en valor desta infraestrutura por parte da Xunta de Galicia, por un importe de mais de 700 mil euros. O delegado territorial destacou que se trata dunha actuación integral para mellorar a seguridade da ponte e garantir así a súa conservación.
Un aspecto este no que coincidiron tamén os dous alcaldes. Tanto Santiago Freire coma Manuel González destacaron a importancia da infraestrutura dun gran valor histórico, e un ben catalogado patrimonialmente.
As empresas interesadas en facerse con esta actuación terán de prazo ata finais deste mes de marzo para presentar as súas ofertas.
