CAMBADOS> Cambados trasladou a hoxe os actos polo Día Mundial do Autismo. Dous veciños da localidade que padecen a doenza foron os escargados de le-lo manifesto. Destacaron as consecuencias que está a te-la covid para eles, polo uso da máscara e a redución das relacións sociais. Reivindicaron igualdade de dereitos e un esforzo engadido por parte das administracións para atopar saídas laborais e unha educación de calidade.
Ademais da lectura do manifesto, a cambadesa praza de Fefiñáns acolleu unha xornada de convivencia para tomar conciencia sobre o autismo. Nos actos estiveron representadas a Federación Autismo Galicia, de BATA e do colectivo Familias Azuis. A súa presidenta, cambadesa e nai de Xabi, pide que se garantan os seus dereitos para que poidan gozar dunha vida plena.
A inclusión das persoas con autismo depende tamén da súa visibilidade. Un reto que aínda segue a ser unha tarefa pendente.
Actos como o desta mañá en Fefiñáns, di a alcaldesa, contribúen a esa tarefa de visibilización do autismo. Na praza desenvolvéronse varias actividades co alumnado do Obradoiro de garantía xuvenil.
A esta xornada de visibilización do autismo tamén se uniron os comerciantes cambadeses.
