RIBEIRA> Avance importante de cara á construción do novo auditorio de Ribeira. Esta mañá o alcalde, Manuel Ruíz, e representantes da UTE formada polas empresas Xestión Ambiental e Prace asinaban o contrato que marcará o inicio da actuación. Os prazos que manexa o executivo pasan porque as obras comecen nun mes, para que o novo edificio poida estar rematado no verán de 2022.
Este é o momento no que o alcalde, Manuel Ruíz, e o representante da UTE formada polas empresas Xestión Ambiental de Contratas e Prace Servicios y Obras procedían á sinatura do contrato que marcará o inicio das obras do novo auditorio. Segundo explicou o propio rexedor, trátase dun momento histórico, xa que a obra, unha vez construída, converterase nunha das actuacións de referencia das realizadas pola Administración Local, cun orzamento de preto dos catro millóns de euros. Segundo el será tamén o expoñente da nova arquitectura en Ribeira, e levará aparellada a transformación urbana da zona na que estará situada como é a praza do centenario.
A intención do Concello é que as obras se inicien xa no prazo dun mes, para que poidan estar rematadas no verán de 2022. O proxecto, que foi deseñado por un estudo de arquitectura de Palma de Mallorca, será financiado en parte con fondos europeos do programa ‘Máis Ribeira Atlántica’.
