RIANXO> A mellora dos accesos do polígono de Rianxo, que favorece ademais a conexión entre as parroquias de Asados e Taragoña, xa é unha realidade. A delegada territorial da Xunta supervisou o resultado desta obra que supuxo un investimento de máis de 70 mil euros.
A delegada territorial da Xunta na Coruña desprazouse esta mañá ata Rianxo para supervisar as melloras nos accesos que se veñen de acometer no parque empresarial de Té. A Consellería de Economía e Industria destinou máis de 70 mil euros para o acondicionamento deste viario que favorece a conexión entre as parroquias de Taragoña e Asados.
Ademais da renovación do firme procedeuse á substitución da rede de pluviais e o concello xa traballa nunha segunda fase para ampliar a liña de saneamento. Neste sentido, o alcalde agradeceu a colaboración da administración autonómica para acometer este a outras obras como as enmarcadas no plan de camiños rurais ou no plan de embelecemento do litoral.
Xunto coa mellor dos accesos no polígono rianxeiro, a delegada indicou que nesta anualidade se executaron tamén reformas nos parques empresarias de Boiro e Noia que ascenderon ós 200 mil euros.
