POIO> Pouca transparencia, pouca participación, máis impostos e máis débeda. Así resume o PP de Poio a xestión do goberno local nestes dous primeiros anos de mandato. Os populares organizaron esta mañá unha concentración simbólica ás portas do Concello para denunciar o que consideran ‘nefasta’ xestión do tripartito.
Falan de máis impostos e máis débeda, din, que comprometerá a xestión do executivo que ocupe o concello tralas eleccións de 2023.
Ademais, os populares din que o tripartito non está a cumprir co seu compromiso de incrementa-la participación cidadá e a transparencia. Indican que medidas como a retransmisión dos Plenos é grazas a eles.
Tamén asumen os méritos dalgunhas das medidas tomadas polo concello na xestión da pandemia, porque -din- o goberno local chegou tarde.
De aquí a finais do mandato, os populares auguran unha xestión ‘desesperada’ por parte do goberno local do que, din, pouco se pode agardar.