RIANXO> A Policía Local informou de que a partir do vindeiro 1 de xuño, e durante un período de alomenos quince días, o Paseo da Ribeira estará pechado ó tráfico. O motivo non é outro que a realización de diversas obras vinculadas ó proxecto de ampliación da EDAR, que se están a executar actualmente.
A consecuencia das obras a circulación pola zona sufrirá unha reorganización. Os vehículos pesados empregarán o acceso dende a rúa Rinlo, pola estrada de Rianxiño, Arcos Moldes, Fincheira, Xogo dos Bolos e estrada de Tanxil ata a zona portuaria, para acceder ou saír do centro urbano. para o resto de vehículos permitirase circular polo Paseo da Ribeira ata a zona do estreito, polo cal deberán usar rutas alternativas ó tramo comprendido entre o inicio do estreito e o peirao da T de ser o caso.
Ademais procedeuse tamén á reubicación da parada de autobuses e o servizo de taxis para a zona do peirao de Setefogas.
A Policía Local xa instalou sinalización circunstancial na zona.
Dende o Concello apelan á colaboración cidadá para que as ditas modificacións puntuais non causen mais molestias que as estritamente necesarias por mor das obras
