VILANOVA> A Xunta pon a punto o albergue xuvenil das Sinas, en Vilanova. As instalacións estanse a renovar para dar resposta ás necesidades da rapazada que vai pasar alí o verán. Este ano, só poderán participar 60 mozos e mozas por quenda, a metade da capacidade habitual, por mor da covid. A medida forma parte do protocolo deseñado polo goberno galego para previ-la transmisión do virus neste tipo de centros.
O albergue xuvenil das Sinas, no concello de Vilanova, ponse a punto ás portas do verán. O complexo da Xunta está sendo obxecto dunha completa intervención. Con ela búscase dar resposta ás necesidades dos mozos e mozas que pasan aquí as súas vacacións estivais.
No albergue traballan contra o reloxo para telo todo a punto o 1 de xullo. Ese día arrancan aquí os campamentos, como sempre, cunha alta demanda. Con todo, este ano só poderán participar 60 rapaces. A capacidade vese reducida desta volta ao 50%, dentro do protocolo deseñado contra a covid. Unhas medidas que, tal como aconteceu no pasado verán, garanten a seguridade de todas as persoas usuarias.
O que non mudou a covid é o espírito do albergue, que mantén o seu atractivo programa de lecer para un público de entre 13 e 17 anos. A visita da rapazada a Vilanova nos meses de verán é un clásico que se repite dende hai 70 anos. Unha experiencia que, de seguro, moitos dos 240 mozos que pasarán por aquí este ano lembrarán por moito tempo.