O instagramer Gotzon dálle ‘like’ á comarca do Salnés

CAMBADOS> Milleiros de seguidores do instagramer Gotzon están a descubri-lo Salnés a través das súas redes sociais. O mozo anda estes días percorrendo a comarca, grazas a unha acción promocional da Mancomunidade. O instagramer percorreu a variante espiritual e fixo tamén un treito da ruta da Pedra e da Auga. As súas publicacións superan os 25.000 ‘gústame’.

Ten case 650.000 seguidores no seu Instagram e deste xeito presume da súa estadía na comarca do Salnés. O popular Gotzon anda estes días pola zona para coñecer algúns dos seus princiais encantos. Visitou xa varios municipios da zona, como O Grove, Sanxenxo ou esta mesma mañá Cambados. Alí, visitou o pazo de Fefiñáns na compaña da presidenta da Mancomunidade do Salnés e da alcaldesa da Vila do Albariño.

Ademais, nos últimos días percorreu parte da variante espiritual e tamén un treito da Ruta da Pedra e da Auga. Un turismo de natureza que, polo que nos conta, encántalle vivir sempre na compaña da súa cadela.

As súas publicacións en Instagram están a cativar aos seus seguidores. Superan xa os 25.000 ‘gústame’. A visita do instagramer forma parte dunha acción promocional da Mancomunidade do Salnés. Está pensada en especial para un público mozo.

Esta tarde, o instagramer visitou a Illa de Arousa. Mañá xa marcha, pero coa promesa de volver pasar uns días de lecer polo Salnés no mes de agosto.