POBRA> Durante a visita puxo en valor este tipo de instalacións que promoven a eficiencia enerxética.
A conselleira do Mar, Rosa Quintana, visitou hoxe as obras da fábrica de transformación e conservación de especies procedentes da pesca que a empresa Frigonor Coldstore está a construír no polígono da Tomada, no concello da Pobra.
Durante a visita, a titular de mar tivo tempo de coñecer algúns dos aspectos do proxecto construtivo, entre eles que as instalacións buscan o aforro enerxético e que conten con procesos máis eficientes e responsables na protección do medio ambiente. Neste sentido, Rosa Quintana lembrou as axudas que o Goberno Galego promove para este tipo de actuacións das que esta firma puido beneficiarse cunha achega duns 7 millóns de euros.
A nova instalación ocupará unha superficie de máis de oito mil metros cadrados Incluirá dúas plantas para a elaboración, dúas cámaras de almacenamento en conxelación e unha zona para operacións loxísticas e de clasificación con acceso a oito peiraos de carga e descarga. Tamén disporá dun espazo para oficinas e instalacións laborais.
A empresa Frigonor Coldstore pertence ó Grupo Suflenorsa, á que tamén pertence Alicrusa, un almacén frigorífico de produtos do mar cuxas instalacións están emprazadas tamén no parque empresarial pobrense.
