POIO> A parroquia de San Salvador, en Poio, pode presumir de ter a súa propia cervexa. Chámase Salvadora, e nace da colaboración de dúas empresas poienses dedicadas á produción de cervexa artesá: Meiga e Palmkids. Hoxe presentárona, como non podería ser doutro xeito, na parroquia de San Salvador.
Hoxe é 6 de agosto, día de San Salvador, pero o seu patrón non foi o único que esta parroquia de Poio puido celebrar nesta xornada. Xa poden presumir de ter a súa propia cervexa: Salvadora.
Detrás de Salvadora están dúas coñecidas marcas de cervexa artesá Meiga e Palmkids. As dúas empresas elaboran na parroquia de San Salvador cunha visión global do mundo cervexeiro.
Meiga e Palmkids explican que este é o produto dunha longa amizade e que non será o único. A intención é lanzar unha liña de cervexas artesás elaboradas de xeito conxunto.
Salvadora presume de ser de Poio. Tanto que na súa etiqueta leva unha reinterpretación do escudo do concello. Por iso o goberno local non podía permanecer alleo.
Segundo explican os seus elaboradores, pronto poderemos atopar esta cervexa tan especial no mercado.
