PONTEVEDRA> A Xunta de Galicia defende o uso do certificado covid na hostalería. O presidente autonómico confirmou esta mañá que xa presentaron a solicitude de autorización xudicial ante o Tribunal Superior de Xustiza de Galicia para que lles permita esixir esta documentación para entrar nos locais hostaleiros. Recordemos que o tribunal suspendeu a medida porque non fora ratificada xudicialmente.
A Xunta de Galicia xa pediu ao Tribunal Superior de Xustiza de Galicia que autorice o uso do certificado covid na hostalería.
A medida foi decretada hai case tres semanas polo goberno autonómico, e implantaba a obriga de presentar un certificado de vacinación completa ou de ter pasado a covid19, ou unha proba diagnóstica negativa nas últimas 72 horas para acceder ao interior da hostalería. Só se aplicaba nos locais de concellos de nivel máximo e alto e no ocio nocturno dos municipios nos niveis medio e baixo de alerta. Pero onte o Tribunal Superior autonómico suspendeu este requisito porque non fora ratificado xudicialmente.
Núñez Feijóo apuntou que máis do 70% da poboación galega ten xa a pauta completa de vacinación e defendeu o uso do certificado covid como unha medida boa para a hostalería.
O presidente da Xunta lamentou a falta dunha lei estatal que permita artellar este tipo de mecanismos, que deixen as medidas das autonomías pendentes da interpretación dos diferentes tribunais.
