Veciños da urbanización pontevedresa Fuensanta denuncian o abandono do concello

PONTEVEDRA> Veciños da urbanización Fuentesanta, en Pontevedra, denuncian o abandono do concello. Aseguran que levan tempo chamando a atención sobre o mal estado dalgúns equipamentos e a acumulación de maleza e de lixo preto das súas casas. Unha situación que incluso provocou a aparición de ratas que rillan o cableado dos servizos.

Hai ao redor de 7 anos que o concello de Pontevedra recepcionou as obras da urbanización de Fuentesanta, na parroquia de Salcedo. Os veciños denuncian que dende entón quedaron esquecidos das actuacións municipais.

Dende o momento da recepción das obras, hai espazos que se mantiveron privados e de cuxo mantemento se encargan os veciños. Pero aseguran que o mal estado das zonas públicas provocou, incluso, a aparición de ratas.

Preocupa especialmente o estado dunha parcela pegada á urbanización. Os veciños cren que é propiedade de ADIF, pero reclaman ao concello que interceda para esixir a súa limpeza. Tamén denuncian que o servizo de recollida de lixo é deficiente na zona.

Explican que dende a asociación de veciños xa mantiveron unha reunión no concello de Pontevedra co alcalde pero, polo de momento, non se atenderon as súas demandas.