RIBEIRA> Pescadores deportivos de Ribeira reúnen máis de 600 sinaturas para lograr que se flexibilicen as limitacións á súa actividade nas zonas portuarias. Mantiveron unha xuntanza co alcalde, Manuel Ruíz, para obter a súa mediación ante a Administración Autonómica.
O alcalde de Ribeira, Manuel Ruíz, mantivo unha xuntanza no Concello cunha representación de practicantes de pesca deportiva do municipio, preocupados polo que entenden excesivas limitacións para o desenvolvemento desta actividade de ocio nas zonas portuarias.
Os usuarios trasladáronlle ó rexedor que entenden a necesidade de que os traballadores profesionais exerzan o seu labor sen ningún tipo de obstáculo, máis consideran que se deben flexibilizar as restricións establecidas á hora de levar a cabo unha actividade que non ten ánimo de lucro e goza dun alto número de usuarios, sobre todo entre a mocidade e entre as persoas xubiladas.
Ademais entregáronlle máis de 600 sinaturas recollidas nas últimas semanas.
Dende a Xunta insisten na necesidade de regular esta práctica ó existir incompatibilidades entre o desenvolvemento dunha actividade profesional e outra que non o é.
