RIBEIRA> A delegación do Colexio de avogados da Coruña no Partido Xudicial de Ribeira oponse ó traslado das competencias en materia de xénero a un xulgado específico en Santiago. Consideran que suporá un prexuízo para os profesionais e, especialmente, para as vítimas ante a perda de eficacia e rapidez na resolución dos casos.
Son moitos e moi variados os motivos para opoñerse á eliminación das competencias territoriaIs en materia de violencia de xénero que ostenta o xulgado de Ribeira. A pretensión de crear un xulgado específico en Santiago que absorbería o partido xudicial de Ribeira suporía un grave prexuízo para as vítimas, agravando aínda máis a súa situación de vulnerabilidade. Ademais de ter que desprazarase ata Santiago, tanto as vítimas como as testemuñas, o traslado de competencias suporía o colapso do novo xulgado que implicaría un retraso en tódolos procedementos.
Os letrados consideran que a decisión non se basea en criterios obxectivos posto que o partido xudicial de Ribeira conta cun sistema de protección integral das vítimas, unha xuíza especializada en violencia de xénero e unha altísima taxa de resolución de casos.
A decisión aínda está pendente de resolución por parte do Consello Xeral do Poder Xudicial polo que dende a delegación de avogados están tratando de implicar ós partidos políticos e á sociedade civil na súa demanda. Piden que Ribeira manteña as competencias territoriais co fin de manter na comarca un servizo público tan necesario.
