PORTO DO SON> A actividade, que está organizada pola concellería de Medio Ambiente, desenvolverase este sábado, a partir das once da mañá.
Esta mañá presentábase na casa de cultura de Portosín a xornada de concienciación ambiental organizada pola concellería de Medio Ambiente. A actividade desenvolverase este vindeiro sábado, a partir das once da mañá, na praia de Aguieira.
Na iniciativa tomarán parte o regatista olímpico local, Iago López Marra, e a súa noiva, a brasileira Kahena Kunze, medalla de ouro nos pasado Xogos de Tokio. Os dous destacaron a importancia de xornadas coma esta e tamén da necesidade de coidar o noso medio ambiente.
No desenvolvemento da actividade, enmarcada na campaña ‘Infinitamente Natural’, colaboran tamén diversas entidades locais como é o caso do Real Club Náutico de Portosín, a Escola de Surf As Furnas ou a propia Confraría de Pescadores de Portosín.
Non haberá límite de prazas nin se require tampouco inscrición previa. Tódolos participantes recibirán un agasallo do Concello e participarán tamén nun sorteo.
