PONTEVEDRA> Xuño foi un mes negro nas estradas da provincia de Pontevedra. Nove persoas perderon a vida en accidentes de tráfico producidos nese mes. Son a metade dos falecidos que se levan rexistrado entre o 1 de xaneiro e o 31 de agosto deste 2021, un total de 18. Dous máis que o ano pasado e a mesma cifra que no 2019.
O 2021 non está a ser un bo ano nas estradas da provincia de Pontevedra. Entre o 1 de xaneiro e o 31 agosto 18 persoas faleceron en accidentes de tráfico.
O mes de xuño foi especialmente tráxico. Rexistráronse seis accidentes con nove vítimas mortais, entre eles o que se produciu o día 2 na N-640 en Caldas con tres falecidos de entre 18 e 24 anos. En xullo e agosto, pola súa banda, baixou a mortandade nas estradas.
En canto ás probas de alcohol e drogas, durante o verán realizáronse máis nas estradas pontevedresas: un 16% máis de alcoholemias e un 500% máis para detectar substancias estupefacientes. Pola contra baixou o número de positivos, ao 2% na alcoholemia e ao 39% no drogo test.
No referente á mobilidade, no verán deste ano rexistráronse menos desprazamentos nas contornas das principais cidades, Vigo e Pontevedra. Na capital baixou un 0,7% respecto a 2019; en agosto aumentou un 0,5%.
