RIBEIRA> A longa ponte desta pasada fin de semana deixou tamén diversos incidentes en Ribeira. Un deles tiña lugar na rúa Mendiño, na que uns mozos, causaron danos a uns dez vehículos estacionados no lugar.
Ó parecer os feitos aconteceron na madrugada do martes, festividade do Pilar. Unha chamada anónima á Policía Local alertou ós axentes, que cando se achegaron á zona xa se atoparon cos estragos nos vehículos.
Segundo informaron fontes policiais abriuse unha investigación ó respecto, co fin de aclarar o acontecido, e dar cos posibles autores dos feitos.
Por desgraza non é a primeira vez que se producen este tipo de incidentes na localidade. Hai xa semanas, varios vehículos tamén sufriron importantes danos cando estaban estacionados na zona de Bandaorrío.
