O GROVE> Remata o conflito de Thenaisie Provote con sabor agridoce para a CIG. A xuíza instrutora do concurso acepta a oferta de Tomás Guillén, a empresa que menos postos de emprego garantía. Tanto a factoría do Grove como a de Mos seguirán operando con tan só 19 traballadoras, o que supón que outras 120 quedarán sen emprego.
Despois de moitos meses de loita, remata o conflito de Thenasie Provote. A empresa finalmente continuará operando na factoría do Grove. O pasado día 21, a xuíza instrutora do concurso aceptou a oferta de Tomás Guillén, unha das tres empresas interesadas e a que menos gustaba no sindicato da CIG.
A oferta de Tomás Guillén manterá tan só 19 postos de traballo, mentres que as outras dúas superaban os 70. Isto supón que preto de 120 traballadoras quedarán sen emprego.
A desconfianza da CIG e das traballadoras coa oferta de Tomás Guillén ven dada polos plans da empresa. A compañía renovará por completo a factoría o que suporá estar preto dun ano sen actividade.
Dende a CIG agardan que a empresa cumpra co prometido e que unha vez recuperada a actividade poida contratar a máis traballadoras. Tomás Guillén terá agora un mes para pechar unha compra que superará os 3 millóns de euros.
