PONTEVEDRA> Logo do parón pola pandemia, regresaron os Premios Pontevedreses do Ano. O distintivo de honra foi parar este ano a todo o persoal sanitaria da área de Pontevedra e O Salnés. Tamén foi distinguida a Cruz Vermella, polo seu labor social, ou Teresa Portela, na categoría de Deportes. Á gala destes premios, organizados polo Diario de Pontevedra, asistiron tamén o alcalde da cidade e o presidente da Xunta.
A pandemia deixou en branco a páxina de 2020, pero non puido coa de 2021. A cidade recuperou os Premios Pontevedreses do ano, impulsados polo Diario de Pontevedra, nunha emotiva gala marcada polos reencontros. Entre os galardoados, a Escola de Enxeñería Forestal, o actor Celso Bugallo e a deportista Teresa Portela. Tamén a Cruz Vermella, na categoría de labor social.
Pero sen dúbida o momento máis emotivo da noite produciuse coa entrega do premio de honra. Foi para todo o persoal sanitario da Área de Pontevedra e O Salnés. Máis de 3.500 profesionais que deron o mellor de si para facerlle fronte ao virus.
Á gala acudiu tamén o alcalde da cidade. Miguel Anxo Fernández Lórez non deixou escapa-la oportunidade de agradecer ós sanitarios o seu esforzo fronte á covid. Tamén o presidente da Xunta destacou o traballo dos sanitarios e recoñeceu ao resto de premiados. Un exemplo, dixo Feijóo, da Galicia que se esforza e traballa a prol dos demais. E indicou que Galicia e Pontevedra seguirán tendo un futuro prometedor se somos quen de acumular propostas que non destrúan o que xa temos.
