NOIA> Noia volverá a ofertar este Nadal un campamento para os máis pequenos da casa, de idades comprendidas entre os 3 e os 12 anos. A actividade desenvolverase no ximnasio do IES Campo de San Alberto, en horario de mañá dende o día 22 de decembro ata o 4 de xaneiro.
Será totalmente gratuíto, aínda que o Concello ofertará a maiores un servizo de canguraxe dende ás sete e media da mañá e de recollida ata as dúas e media que si terá un custe para aquelas familias que o soliciten.
O número de prazas dispoñibles para o campamento será de 70, que se cubrirán por rigorosa orde de inscrición.
O prazo para inscribirse abrirá mañá xoves, no propio rexistro xeral do Concello.
A maiores, e co fin de conciliar tamén a vida familiar e laboral das familias, o Concello ofertará este Nadal uns obradoiros en horario de tarde no claustro do Concello. Para estes últimos non será necesario inscrición.