Profesionais de enfermaría e fisioterapia denuncian sobrecarga de traballo e mobilízanse para ‘salvar’ a Atención Primaria

PONTEVEDRA> Profesionais de enfermaría e fisioterapia mobilízanse para salvar a Atención Primaria. Esta mañá manifestáronse diante do centro de saúde da Parda para reclamar que se remate coa sobrecarga de traballo e a precariedade que sofren. Recordan que estas cuestións afectan, finalmente, á atención que recibe o paciente.

Os profesionais de enfermaría e fisioterapia din basta xa. O colectivo denuncia o grave deterioro que está a sufrir a Atención Primaria e reclaman que se poña fin á sobrecarga de traballo que sofren.

Esixen tamén que se atopen solucións ao aumento das listas de espera, que poidan ter máis tempo para atender a cada paciente e que se remate coa supresión paulatina de programas de prevención e promoción da saúde.

Hoxe concentráronse diante do centro de saúde da Parda. Mobilízanse, aseguran, para salvar a a Atención Primaria. E é que recordan: o abandono deste servizo afecta finalmente á atención que reciben os pacientes.

Por iso demandan que se desbloquee a tramitación parlamentaria da Lei de Seguridade do Paciente. Tamén que se poña en valor o traballo dos profesionais de enfermaría e fisioterapia  no sistema sanitario.

A mobilización respondeu a unha convocatoria do sindicato SATSE en Galicia, que se reproduciu de xeito simultáneo en todas as capitais de provincia.

DEIXAR UNHA RESPOSTA

Por favor, engade un comentario!
Por favor, engade o teu nome aquí