VILAGARCÍA> Vilagarcía deseña o dispositivo de seguridade para a Festa da Auga, a cita máis multitudinaria do concello. Por primeira vez, porase en marcha unha unidade móbil de vixilancia dotada con dez cámaras que axudarán a manter controlado o centro da vila. Este ano agárdase que a festa sexa multitudinaria, superando as 30.000 persoas que se contabilizaron o ano pasado.
Ao redor de 30.000 persoas contabilizáronse o ano pasado na Festa da Auga de Vilagarcía. Este 2025 a cita cae en sábado e agárdase que a afluencia sexa aínda maior. Por iso, o deseño do dispositivo de seguridade centrou a reunión que hoxe celebrou a xunta local de seguridade.
Unha das novidades é que por primeira vez Vilagarcía contará durante a Festa da Auga cunha unidade móbil de vixilancia, dotada con dez cámaras, que axudará a manter controlado o centro da vila. Gravaranse as zonas de especial concorrencia, como O Castro, a avenida da Mariña ou a Baldosa. As cámaras estarán acendidas dende o venres 15 de agosto ás 7 da tarde ata o sábado 16 á mesma hora.
Ademais mantéñense as medidas de seguridade habituais: reforzo de patrullas, con máis presenza policial nas rúas e controis de tráfico nas saídas da cidade; punto Lila para a prevención das agresións sexuais na praza da Segunda República; e un Punto medicalizado na praza da Peixería.
A maiores, Losada apuntou que, de ser necesario, desprazaranse á cidade axentes da Unidade de Prevención e Reacción de Vigo tanto para San Roque coma para o Atlantic Fest e o Revenidas.
