PONTEVEDRA> Unión en Pontevedra para condenar a invasión rusa en Ucraína. Concello, Deputación e Subdelegación, con representantes tanto do goberno como da oposición, participaron na concentración silenciosa de cinco minutos convocada ás portas de Michelena 30. Ao acto, impulsado dende a Federación Española de Municipios, tamén se uniron varios veciños para amosar a súa solidariedade co pobo ucraíno. Dende as administracións chamaron, tamén, a ordenar e coordinar a vaga de solidariedade.
As portas de Michelena 30 foron o escenario no que Pontevedra respondeu á convocatoria da Federación Española de Municipios e Provincias. Representantes do concello, da Deputación e da Subdelegación do Goberno gardaron cinco minutos de silencio para condenar a invasión rusa en Ucraína.
Antes de participar nesta convocatoria, Carmela Silva asistiu a unha reunión convocada pola Femp para abordar a situación, e insistir na necesidade da posta en marcha dun plan de acollemento a refuxiados.
Pola súa banda, Maica Larriba insistiu na implicación do Goberno Central para minimizar o impacto da traxedia. Ademais, os tres dirixentes fixeron fincapé na necesidade de coordinar a avalancha de solidariedade que está a provocar este conflito entre a sociedade.
Á concentración sumáronse decenas de veciños que quixeron expresar tamén o seu apoio ao pobo ucraíno. Entre eles, un grupo de mozos que levaban carteis en ruso con mensaxes en contra da guerra.
