A Deputación da Coruña investirá 300 mil euros na ampliación do Club de Remo da Pobra

A POBRA> O presidente provincial anunciou este investimento no transcurso dunha vista á localidade na que tamén tivo ocasión de visitar as instalacións do centro de coworking.

O pleno de Deputación da Coruña vén de dar luz verde a un expediente de modificación de crédito no que se inclúe unha partida de 300 mil euros para a ampliación da sede do club de remo da Pobra. As obras consistirán na construción de dous módulos que permitirán ampliar a zona de almacenaxe das embarcacións así como o ximnasio e os vestiarios.

Ademais de garantir unhas mellores condicións de adestramento para os preto de 150 deportistas que integran o club de remo, a actuación dotará ó centro dunha maior accesibilidade coa construción dunha ampla beirarrúa entre a estrada e o edificio dando continuidade ó paseo existente no parque do Castelo.

Trala visita á sede, o presidente da Deputación realizou tamén unha visita ás instalacións do espazo de coworking que se vén de integrar na rede de espazos colaborativos da Deputación.