Unha mostra itinerante repasa na Pobra os 50 anos da Casa de Rosalía

A POBRA> Chega á Pobra a exposición itinerante do 50 aniversario da Casa de Rosalía. Trátase dunha mostra que repasa a historia da Casa da Matanza convertida hoxe nun museo sobre a vida e obra da máis ilustre escritora galega.

Coincidindo co 50 aniversario da Casa da Matanza, a fundación Rosalía de Castro promove esta exposición itinerante que xa se pode visitar na praza do emigrante da Pobra ata o 5 de abril. A mostra, comisariada por Pepe Barro, pretende poñer en valor a recuperación e musealización do inmoble ó tempo que fai un repaso pola súa historia dende que en xullo de 1971 abriu as súas portas ó público.

O acto inaugural contou ademais coa presenza da deputada provincial de Normalización Lingüística, María Muíño.

Os primeiros en coñecer a mostra foron os alumnos de sexto do colexio Salustiano Rey Eiras cunha visita teatralizada da man da propia Rosalía, encarnada pola actriz Tero Rodríguez.