O Salnés, á cabeza da baixada do paro nas Rías Baixas

RÍAS BAIXAS> Descenso xeneralizado do paro en toda a nosa contorna. Os mellores datos rexístranse na comarca do Salnés, onde se rexistran 300 desempregados menos. Os sindicatos destacan, en especial, o aumento dos contratos indefinido. Entenden que a reforma laboral comeza a ter xa o seu efecto, servindo de contención ante a guerra de Ucraína ou a crise da enerxía e os carburantes.

No Salnés hai hoxe case 7.400 persoas no paro. Son 300 menos respecto do mes anterior. A comarca sitúase entre as que lideran a caída do paro en Galicia. Entre os concellos, salienta o tirón de Sanxenxo, onde se formalizaron un cento de contratos; seguido do Grove ou Meaño. Iso débese, segundo entenden de CCOO, á reforma laboral que vén de aproba-lo goberno.

Do outro lado da ría os datos tamén son positivos. No Barbanza hai medio cento de desempregados menos, quedando o total de parados en pouco máis de 3.200. Estes datos, seica poderían ser aínda mellores se non fose polo impacto da crise da enerxía e os carburantes e a guerra de Ucraína.

Tamén boas novas na bisbarra de Caldas: Alí o paro baixou en 40 persoas, quedando en pouco máis de 1.900 desempregados. E baixa, pero moi pouco, na de Pontevedra: redúcese en 15 parados, quedando en pouco máis de 7.500. No conxunto de Galicia, o desemprego reduciuse en case 1.200 persoas, situándose en 153.300.

Os sectores onde máis baixou o paro foron industria, servizos e a construción. A vista está posta agora na Semana Santa e, en especial, na recuperación do sector do turismo, unha vez superadas as restricións da pandemia.