RIBEIRA> As Conselleiras de Medio Ambiente e de Política Social participaron esta mañá na entrega de premios do Concurso Parque Vibras. Os equipos dos tres centros educativos premiados recolleron os galardóns nun acto celebrado no Centro de Interpretación do Parque Natural de Corrubedo.
Involucrar á mocidade na protección do patrimonio natural de Galicia e difundir os seus valores. Este é un dos obxectivos principais do primeiro Concurso Parque Vibras que convocou a Consellería de Medio Ambiente para o alumnado terceiro e cuarto da ESO.
Consistía na elaboración de vídeos de non máis de tres minutos sobre parques naturais para a súa difusión a través das redes sociais. Un total de 36 equipos de 23 centros de toda a comunidade participaron nesta primeira edición que culminou hoxe coa entrega de premios nun marco incomparable como o Parque Natural de Corrubedo.
O premio ó vídeo máis creativo foi para para o equipo Carambolas do CPI As Revoltas de Cabana de Bergantiños, o de maior valor divulgativo para Lume Verde do IES Río Cabe de Monforte de Lemos e o máis viral para Vilanchos, do IES Breamo de Pontedeume. Ademais do valor dos tres proxectos premiados, a Conselleira destacou a alta calidade de tódolos traballos presentados que implicaron a medio milleiro de alumnos.
