PONTEVEDRA> Susto na gasolineira de Cerponzóns. Onte ao fío das 10 da noite un home armado intentou roubar no establecemento. Os seus plans foron finalmente frustrados por un dos traballadores e varios veciños da contorna. Tras enfrontarse e increpar ao ladrón, conseguiron que fuxira sen levar nada. A Policía Nacional xa busca ao responsable.
Nesta gasolineira de Cerponzóns, en Pontevedra, aínda teñen o susto no corpo. Ás dez da noite de onte un home armado intentou atracar o establecemento.
Nese momento no establecemento só estaba un dos seus traballadores. A súa reacción: facerlle fronte. Os seus berros alertaron a varios clientes do bar do lado, que saíron na súa axuda. Finalmente, o ladrón marchou e fuxiu nun vehículo onde o agardaba un cómplice.
Segundo conta José Manuel González, compañeiro do traballador que sufriu o intento de atraco, o balbordo chamou a atención das persoas que pasaban pola zona nese momento, que deron a voz de alarma á Policía Nacional.
A pesares do mal trago, finalmente non houbo que lamentar feridos. Tampouco o ladrón conseguiu o seu obxectivo.
José Manuel asegura que hai anos que non sufrían un episodio deste tipo nesta gasolineira de Cerponzóns. Si que recorda que noutra ocasión era el quen estaba de garda.
Agora a Policía Nacional busca aos responsables do intento de atraco de onte, apoiando as pesquisas nas imaxes das cámaras de seguridade da gasolineira. Segundo as testemuñas, o ladrón era un home de entre 30 e 35 anos, que non é veciño da zona.
