O BNG insta á Xunta a asumir o vial que une a autovía do Barbanza co AP-9 en Caldas

RIANXO> A solicitude formulada agora polo BNG non é unha petición nova. Trátase dunha reclamación de vello, que xa realizaron en máis dunha ocasión diversas asociacións empresarias e concellos do Barbanza. Mesmo as dúas Deputacións, a da Coruña e a de Pontevedra, téñenlle reclamado tamén a Xunta que asuma as competencias da estrada EP-8001, que une a autovía do Barbanza, a través da ponte de Catoira, coa AP-9, en Caldas, para convertela nunha vía de alta capacidade.

Os nacionalistas entenden que esta estrada constitúe a saída natural dende o Barbanza cara á provincia de Pontevedra, e polo tanto soporta un elevado tráfico diario, moito del pesado, conformando un eixe vertebrador entre as dúas comarcas.

Segundo Rosana Pérez Fernández a Xunta xa incumpriu o acordo subscrito coa Deputación de Pontevedra no ano 2010 para facerse coa titularidade desta estrada, que tamén aparecía incluída  no coñecido Plan Move 2009-2015.

A transferencia desta estrada a Xunta permitiría acometer tamén unha mellora significativa deste vial no que se producen un alto índice de sinistros, algúns deles mortais.