PONTEVEDRA> Hoxe botou a andar o PonteAlmorzo. Nesta primeira edición do concurso de almorzos participan case unha vintena de establecementos hostaleiros da cidade. Un bo número, tendo en conta que a iniciativa acaba de nacer.
Os clientes poderán votar polo seu almorzo favorito ata o vindeiro día 15. Para iso, nos locais que participan hai urnas nas que podemos ir votando pola proposta que máis conquiste o noso estómago. A iniciativa busca dinamiza-la hostalería da cidade, tamén na franxa da mañá, ao tempo que se fomentan os hábitos de vida saudables.
O PonteAlmorzo está organizado pola Concellería de Promoción Económica de Pontevedra xunto coa Asociación de Hostaleiros da cidade. Forma parte do proxecto Pontevedra Capital Gastro.