O BNG pide que se dote dunha ambulancia medicalizada ó hospital do Barbanza

RIBEIRA> O BNG da Barbanza leva ó Parlamento a necesidade de dotar á comarca dun servizo permanente de ambulancia medicalizada. A formación recolle unha vella reivindicación tanto de particulares coma de diversos colectivos, que chegaron a reunir preto das cinco mil sinaturas, para tratar de conseguir este servizo, ó consideralo prioritario.

Xa en agosto de 2019, un veciño de Boiro iniciou unha campaña para solicitar unha ambulancia medicalizada para a comarca. Ademais de presentar escritos en tódolos concellos e na mancomunidade Barbanza Arousa promoveu unha campaña de recollida de sinaturas na que reuniu máis de 4000 firmas e concitou o apoio de trece entidades da bisbarra. A pesar do clamor popular, a Fundación Pública Urxencias Sanitarias de Galicia-061 rexeitou a petición alegando que o Barbanza non cumpría cos criterios para dispoñer deste servizos.

Agora o BNG volverá a levar ó Parlamento esta vella demanda para que, dunha vez por todas, se dote ó hospital Barbanza dun servizo asistencial básico, máis nun centro que carece de UCI.

Dende o BNG lembran ademais que levan anos presentando emendas ós orzamentos autonómicos para que se inclúa unha partida de cen mil euros para este fin.