RIBEIRA> Unha senda peonil conectará o paseo marítimo de Coroso coa estrada AC-305 na zona das Saíñas. O proxecto permitirá recuperar a zona de servidume do río Grande, actualmente moi degradada.
Iniciado o expediente de expropiación para a creación dunha senda peonil que conectará o paseo de Coroso coa estrada AC-305. Trátase dun proxecto enmarcado no programa Máis Riberia Atlántica cofinanciado nun 80 por cento polos fondos FEDER. A pasarela, de preto de 300 metros de longo, discorrerá dende o arroio Saíñas ata o paseo marítimo contribuíndo tamén a recuperar unha zona moi degradada a carón do río Grande.
Favorecerase a súa integración paisaxística e ambiental coa utilización de pavimento natural flanqueado por bordos de madeira. O orzamento da actuación ascende ós 180 mil euros e o prazo de execución é de catro meses.