BARRO> Onte no pleno de Barro confirmouse a marcha de tres dos catro edís do Partido Popular ao grupo de non adscritos. José Antonio Landín, José Suárez e Lucho Martínez abandonaron a formación popular. Fixérono ao día seguinte de firmar ante notario a constitución dun novo partido político, Xuntos por Galicia, presidido polo propio Landín.
José Antonio Landín, José Suárez e Lucho Martínez formalizaron o seu divorcio do Partido Popular de Barro. No pleno celebrado onte pasaron a formar parte do grupo de edís non adscritos.
O PP queda así cun único concelleiro, Alberto Diz. El forma parte da xestora que dirixe o partido en Barro, presidida por Eduardo Ruadas. O seu nomeamento foi o que desatou a treboada que rematou coa marcha de Landín, Suárez e Martínez.
O paso dos tres concelleiros ao grupo de non adscritos oficializouse ao día seguinte de que formalizaran a constitución dun novo partido político: Xuntos por Galicia.
A nova formación ten a Landín como presidente. Suárez é o seu secretario e Lucho Martínez, o tesoureiro. O partido nace con vocación local pero tamén autonómica.
O seu presidente adiantou que están a manter contactos con outros municipios para poder presentar listas máis aló de Barro nas eleccións municipais do 2023.
Iso si, non concretou os concellos nos que se están a producir estas conversas, aínda que os rumores apuntan ao posible nacemento de Xuntos por Portas. Ademais, nas redes sociais existe o perfil Xuntos por Ribadumia, moi crítico coa xestión do goberno de David Castro, que se fixo eco do nacemento da formación encabezada por José Antonio Landín.
