POBRA> O principal problema que afrontan os veciños das Carrouchas, na Pobra, é a falla de abastecemento de auga que se agravou especialmente este verán por mor da seca.
Leoncio, ó igual có resto de veciños das sete vivendas da aldea, realiza este percorrido varias veces ó día. Non lle queda máis remedio que acudir a este manancial para abastecerse de auga potable e transportala despois ata a súa vivenda para poder realizar as tarefas cotiás.
Fartos xa desta situación que como din se veu agravando cos anos, os veciños recorreron en repetidas ocasións ó concello para demandar a conexión das vivendas á rede xeral de abastecemento.
Ata agora, din, non recibiron contestación algunha polo que se senten discriminados con respecto ó resto da poboación a pesar de que pagan os mesmo impostos que calquera cidadán.
Ademais dos problemas coa auga, as vivendas carecen tamén de saneamento, servizo que tamén levan anos reclamando sen resposta.
Dende o PP fixéronse eco destas queixas veciñais e volverán instar ó executivo a dotar de servizos básicos a este núcleo. Os populares lembran que a principios de 2019 o pleno aprobou por unanimidade unha moción presentada polo PSOE para acometer a rede de abastecemento de auga, sen que se teña executado ata o momento.
Os populares reclaman unha actuación urxente para o abastecemento da auga, posto que precisaría dun investimento mínimo.
Con respecto ó saneamento piden que se redacte un proxecto e se habilita o financiamento necesario para acometelo a medio prazo.
